熱辣辣嘅夏日嚟緊喇!最適合去沙灘浸下海水降溫消暑!香港有唔少靚沙灘,水清沙幼,睇日出日落都靚到爆!不過最好就搭公共交通工具去,如巴士或小巴,因為沙灘停車場大多數都得好少車位,加上有啲隱世沙灘係要行山路入去。

*溫馨小提示:打卡還打卡,唔好影響到其他人;最重要係 keep住香港有靚景靚水沙灘嘅話,自己垃圾自己帶走喔!

大灣

位於西貢大浪灣,同西灣、東灣同鹹田灣合稱為「大浪四灣」,景色一流,被譽為香港四大奇景之一。大灣係四灣之中最大嘅沙灘,擁有幼白細沙,吸引咗唔少遊艇。不過大灣唔係康文署管轄嘅沙灘,無救生員,加上海面比較大浪,玩水上活動就要多加小心!

前往方法:

坐船:西貢碼頭坐快船

行山:喺西貢市中心坐29R村巴,西灣亭落車。西灣亭>吹筒坳>西灣>鹹田灣>大灣,路程大概1.5小時。

鹹田灣泳灘

同樣都係「大浪四灣」奇景,唔止水清沙幼,適合曬太陽游水,附近有條木板橋橫跨小海溝,絕對係打卡嘅好地方!附近仲有餐廳同沙灘用品店;亦係露營推介點,洗手間等設備齊全,夜晚仲可以好寧靜咁吹住海風睇星星。

前往方法:

西貢市中心坐29R村巴到西灣亭,西灣亭>吹筒坳>西灣>鹹田灣,路程大概1小時鬆

浪茄灣沙灘

鄰近西貢萬宜水庫東壩,海灘平坦寬闊,水清沙幼,一望無際嘅南海,俾人稱為「隱世沙灘」;另外亦可以租遊艇去浪茄灣玩,人煙稀少!

前往方法:

1. 搭來往北潭涌同萬宜水庫東壩嘅9A小巴到東壩,再步行30-45分鐘山徑

2. 西貢坐船直達:最方便快捷的方法就是在西貢問船家坐船,但價錢會比較貴

白腊灣

係糧船灣洲內一個熱門嘅沙灘,假日有唔少人嚟浮潛睇魚、曬太陽,玩獨木舟睇六角柱,甚至露營( *小提醒: 直接喺沙灘紮露係非法的,大家自己衡量喔!)。白腊灣水清沙幼,更有港版馬爾代夫之稱。沙灘旁邊仲有個白腊灣碼頭,碼頭係一座木橋,站到盡頭可以望到成個大海,睇日出亦一流!

前往方法:

<< 建議最好坐的士,大概$130 >>

的士:西貢碼頭出發,坐大約20-30分鐵就到達入白腊村的路口,行大概15分鐘就到沙灘

巴士:西貢巴士總站坐96R,大約30分到北潭涌巴士站落車,沿麥理浩徑第一段車路,經萬宜路向萬宜水庫行,經萬宜水庫西壩之後就到,全程2.5小時

綠蛋島

島上有個小沙灘,水清沙幼而且水淺,適合嬉水浮潛。喺潮退時侯,可直接經沙堤行去綠蛋島,其餘時間都要涉水或游水過去,所以識得游水先好去,而且出發前記得要留意潮汐時間!

前往方法:租船,獨木舟或者行山

行山的話可參考 >>>>>>【2021行山】綠蛋島|玻璃水|打卡靚景|行山爆林徑|香港

龜背灣

位於赤柱,係一個面積小嘅沙灘,但勝在人流少,絕少遊客,環境清靜,兩邊環山,自成一角,水質同樣清澈乾淨。沙灘有浮台、更衣室、小食亭、兒童遊樂場同BBQ場。

前往方法:

1. 在小西灣乘14號新巴或314號城巴,在龜背灣下車,沿馬路旁的樓梯下山即可到達。

2. 柴灣港鐡站乘16M小巴,龜背灣落車。

三星灣

係香港其中一個水質最好嘅海灘,清澈見底嘅海水長期被定為一級水質!雖然泳灘面積唔大,但勝在地處風平浪靜嘅海灣內,吸引到唔少人專程嚟游水同浮潛。沙灘旁仲有燒烤爐,不過燒烤用品同食物就要自帶。

前往方法:

鑽石山地鐵站搭92號巴士到白沙灣碼頭,再喺碼頭坐街渡前往,船程約15分鐘。

長沙泳灘

位於大嶼山南部,係全港最長泳灘,由84年開始,全年水質處於「良好」級別。長沙環境優美,海岸線闊,一望無際,仲可以影到「天空之鏡」。亦係滑浪聖地,沙灘東邊更可以租到獨木舟同槳板,吸引咗唔少人喺附近玩露營車過夜同玩水上活動。

前往方法:

1. 中環碼頭6號坐渡輪去梅窩,再轉坐1,2,4號巴士,上/下長沙沙灘落

2. 喺東涌坐大嶼山巴士坐11,23號,上/下長沙沙灘落

<<車程大概25分鐘左右>>

籮箕灣

除咗擁有遼闊又乾淨嘅沙灘,可看日出、星星,甚至銀河,它亦是香港其中一個很受歡迎的營地之一,好適合露營新手。睇住日光照射喺泥灘,瞬間變成一塊巨形鏡 —「天空之鏡」就咁形成咗,氣氛加上景色,真係美得讓人屏息!

前往方法:

喺東涌坐大嶼山巴士11或23號,喺水口村落車 (上車時向車長表示水口有落),由水口村沿鳳凰徑9段行20分鐘左右

觀音灣泳灘

位於長洲其中一個泳灘,基於附近無船隻停泊,所以水質非常良好。唔單止可以曬太陽同嬉水,想去滑浪又得,可以去水上活動中心租借滑浪設備,大展身手!玩到餓又可以一邊飲住啤酒一邊睇日落!

前往方法:

中環5號碼頭坐新渡輪去長洲碼頭,再行大概10分鐘

Comment比我,一齊分享吓!

%d 位部落客按了讚: