已荒廢及擁有68年歷史嘅皇都戲院將會進行修復工程,並改造成一個藝術文化表演場地。在正式動工前,由新世界旗下非牟利機構 Culture for Tomorrow所舉辦嘅《尋找你我他的皇都》歷史體驗活動,由即日至4月30日期間限定展出,場內將打造成昔日「小上海」舊時面貌,由舊式售票處、舊電影海報燈箱、「小上海」展館,到璇宮戲院嘅經典表演舞台等等,重新演繹當年幕幕經典場境;仿如置身50年代嘅皇都戲院,令人感覺坐上了時光機回到過去。

《尋找你我他的皇都》

入口特別設計為昔日戲院售票處,每位參加者均獲發一張舊式電影戲票,售票處同時展出6款1970年代等嘅戲票文物。 場內同時展出過百件收藏,包括戲院員工制服、英皇道電車站明信片,以及舊北角鳥瞰圖等。除此之外,更罕有展出1978 年已故國際巨星李小龍遺作《死亡遊戲》嘅電影海報同節錄,非常值得去一睹珍貴展品!

參加者更能代入上世紀50年代五位經典角色之一,包括「大娛樂家」、璇宮戲院創辦人歐德禮(Harry Oscar Odell);而飾演「華麗歌后」、「快樂觀眾」同「大導演」嘅你我他,則從聲、影、畫揣摩各個角色嘅心路歷程,親歷上世紀50年代至今嘅璀璨歲月。

更邀請到90後電影海報畫家「無紙用」林嘉恒, 利用皇都歷史同文化元素,創作出多款電影海報,以懷舊風格呈現電影經典角色嘅獨特韻味。仲有年青書法家、「抒發」專頁的創辦人陳家浚 Sam,融入50至60年代同電影相關嘅設計風格,喺商場內鐵閘上將經典書法之美融入日常細節中,抒發他對皇都一事一物嘅感受。

除咗可以親身感受館內懷舊造景之外,展覽仲喺4月中提供線上活動,可以透過網上虛擬導賞觀摩昔日嘅華麗傳奇。但而由於開放時段有限,加上疫情關係需要實施人流管制,因此有興趣參觀嘅朋友,要預先申請成為「尋找你我他的皇都」會員,再電郵到info@culturefortomorrow.org。Culture for Tomorrow將會揀選會員並發出邀請,亦保留最終決定權,獲邀會員將收到附有指定入埸日期同時間嘅電郵。

而Culture for Tomorrow表示,在2026年皇都復修工程完成前,會繼續舉辦更多有關皇都嘅活動,比大家更認識這座建築嘅珍貴價值。

皇都戲院小資訊

係現今僅存嘅珍貴文化古蹟,類似這類富歷史價值嘅五十年代戲院,香港早已蕩然無存。皇都戲院喺1952年落成,戲院大廈同商場則喺1959年落成,戲院地處北角「小上海」文化圈,人流興旺,設計獨特,建築富現代主義色彩,最為特色嘅係皇都戲院天台嘅「飛拱」— 即混凝土桁架同大門牆上浮雕,以拋物線型拱橋式桁架,係舉世無雙嘅獨特設計,喺五十年代時更一度成為國際文化表演地標。戲院於1997年結業後改建成桌球場所,並於2017年被評為一級歷史建築。

仲考慮啲咩?快啲上網預約去!

官方網站:Culture for Tomorrow

日期: 即日至4月30日

時間: 上午10時至下午8時

地點: 北角皇都戲院商場 (北角英皇道279-291號)

Comment比我,一齊分享吓!

%d 位部落客按了讚: