位於油塘同調景嶺之間嘅魔鬼山山頂,可以用另一角度去觀賞維港。而呢座被稱為炮台山嘅小山沿途都係水泥徑,就算係行山嘅初哥都吾會有難度!全程大概120分鐘,漫遊魔鬼山!

油塘站穿過大本營商場喺油塘社區會堂過馬路,左轉沿住去將軍澳華人永遠墳場車路旁邊嘅行人路上斜路,慢慢行大概15分鐘,留意左手邊,會發現有一條樓梯接上衞奕信徑,上樓梯後左轉沿小斜坡慢慢行上山,一邊呼吸下新鮮空氣,又可以回望一下三家村碼頭;加上沿途指示牌都好清晰,唔洗擔心搵唔到路!

魔鬼山

個名字好霸氣,聽都好似好恐怖,而佢嘅別名係炮台山,就同港島區嘅炮台山同名。但其實兩個名都同香港嘅歷史息息相關;魔鬼山山腳正正對住鯉魚門海峽,而海峽正正就係維港嘅出入口,係船家嘅必經之路。喺清朝時候,香港海盜猖狂,鯉魚門係危險區,相傳仲有好多海盜匿藏喺山上,所以附近嘅居民先稱此為魔鬼山。後來香港成為英國嘅殖民地,解決咗治安問題。但亦因為魔鬼山所擁有嘅地理戰略優勢,英軍喺山上建造咗堡壘同炮台去鎮守海峽。可能因為個名唔太吉利嘅緣故,政府喺90年代將魔鬼山嘅官方名稱改為炮台山。魔鬼山炮台同歌賦炮台都被列為二級歷史建築。

啱啱提及過嘅軍事設施,到今時今日仲留守喺山上。向山頂進發途中會有指示牌指住山腰嘅歌賦炮台,上面寫住軍事設施。呢D設施喺1902年先後建成,直到現今已經有超過100年歷史。當中包括歌賦炮台嘅兩座6吋大炮 (1909年將其中一座擴大為9.2吋)同砵甸乍炮台兩座9.2吋大炮。到咗30年代,由於調防關係,歌賦炮台嘅一座6吋大炮喺1910年移走,魔鬼山其餘三座9.2吋大炮亦先後被移往香港島嘅赤柱炮台同鶴咀半島嘅「博夏勒炮台 」。所以導致香港保衛戰期間,日英兩軍喺陸路嘅醉酒灣防線開火,魔鬼山炮台並無發揮到大作用。不過宜家仲有機會見到舊時嘅炮台、彈藥庫、戰壕等等,都好有歷史價值。

之後繼續行,臨上到山頂炮台有一段梯級,企喺果度可以睇到由2018開始動工;將會係全港最大跨度嘅鋼拱橋 — 將軍澳跨灣連接路。

上到梯頂就係山頂砲台入口,真係好似迷宮咁架,兩層嘅高石牆,有唔少通道進入砲台中間;昔日嘅槍口依然保留住,可以感受到昔日嘅戰況。

除咗欣賞古蹟之外,山頂更加可以欣賞到山下嘅景色。270度大海景,東邊嘅可以遠望東龍洲、南邊嘅筲箕灣避風塘同西邊嘅啟德郵輪碼頭都可以一覽無遺。而且魔鬼山面向正西邊,很多攝影發燒友都喜歡喺度影日落。如果想影到日落美景,就要預早上山。有時間嘅話,仲可以等入黑欣賞五光十色的維港夜景,過一個舒適的黃昏。

一場黎到,緊係要去睇埋魔鬼洞拉!系茅湖廢堡向住華人永遠墳場方向,跨出石牆就會見到有一條唔太闊嘅石徑,應該都係山友們行出嚟,單邊有繩作扶手,接近落山一半嘅時候,左邊有一個明顯凹位,有一個小山洞,有人話係礦洞,亦有人話係日軍洞;入面漆黑一片,記得要開住電筒先好入去!基本上都係要鴨仔式行入到,因為個洞真係好窄,另一邊出口就係山區,所以大多數人都係會沿山洞行番出入口!

探險完就繼續沿山路落番衛奕信徑去油塘走,大家可以自行選擇落番去油塘/藍田/調景嶺,沿路都會有指示牌。

*切勿塗鴉或破壞山上的軍事遺跡。另外,入夜後山路沒有街燈,記得要檢查手機是否有電着燈或請自備電筒。

Comment比我,一齊分享吓!

%d 位部落客按了讚: