每年夏天天氣都炎熱曝曬,行山人士必須注意行山路線,最好選擇樹蔭多、路線短、上斜少、補給多同退路多,亦盡量避開最暑熱嘅時間。出發行山前更需要留意天氣,例如酷熱天氣警告或有雷暴警告等等。

橫七古道

位於八仙嶺東北方山腰,山徑連接尤德亭、七木橋、以及荒廢咗嘅十九世紀六十年代舊村,途中亦可以腑瞰鹿頸、南涌以及沙頭角海一帶。整個路線全長大概 10公里,路程大約4小時,雖然路程較長,不過林蔭滿佈,唔算太辛苦。除咗上尤德亭一段較吃力之外,喺林蔭底下行係舒適。古道沿途亦有小橋同舊村遺址可以打卡,古色古香,仍留有昔日痕跡。

路線:鹿頸村 > 尤德亭 > 下七木橋 > 上七木橋 > 橫山腳下村 > 橫山腳上村 > 大尾篤

退出路線可經支路往新娘潭離開

交通

巴士75K,275C,大尾篤站落車。

小巴56K來往鹿頸 — 粉嶺

梧桐寨瀑布

位於大埔林村附近,喺大埔或元朗有巴士直達梧桐寨站,方便至極。整個路線全長大概 5.5公里,連休息同打卡,來回大概4小時,沿路有指示牌,途經4條瀑布:井底瀑、中瀑、主瀑、散髮瀑。其中主瀑更高達30米,係全港最長嘅瀑布,聽住流水聲,洗滌心靈。

路線:林錦公路 > 萬德徑 > 萬德苑 > 井底瀑 > 中瀑 > 主瀑 > 散髮瀑(原路折返)

交通

大埔墟鐵路站或元朗(西)總站搭 64K 巴士,喺「梧桐寨」或「牛欄窩」站下車,巴士站隔離就係入口。 

#注意下雨天切勿前往,以免瀑布水流過急同山泥傾瀉。

龍虎山

由香港大學站出發,經天橋到黃克競樓的平台,轉左行往許愛周科學館,沿途有指示牌。整個路線全長大概 6公里,路程大約需時3小時,途中樹蔭多,涼亭亦多,仲有洗手間;雖然無補給點,但有多支退路,例如在碧珊徑有路落蒲飛路或薄扶林道,行到克頓道亦可以選擇落山返香港大學或一直行到山頂廣場。

路線:香港大學 > 碧珊徑  > 龍虎石澗 > 1號種植場(中草藥園)> 百年松林炮台 > 龍虎山健身徑 > 盧吉道> 山頂廣場

交通

港鐵直接到香港大學站

茅坪

位於馬鞍山嘅茅坪古道同北港古道有大量樹蔭,唔算太曬,仲有自然環境嘅竹林隧道。茅坪藤王嘅藤蔓非常特別,係香港極具特色嘅樹木景點,非常值得一遊,記得打卡之餘請保護環境,唔好攀爬同破壞樹木。整段路線全長大概 7公里,路程大約需時3小時,中途無補給但有涼亭可作小休,記得帶足糧水先起步。

路線:梅子林路 > 梅子林村 > 茅坪古道 > 茅坪坳 (茅坪藤王) > 北港 >竹林隧道> 西貢公路

交通

起點:大水坑港鐵站

終點:九巴92號,新巴792M,小巴1 / 1A

嶂上郊遊徑

位於西貢西郊野公園,由海下路入嶂上郊遊徑,再沿郊遊徑一直去嶂上再到榕樹澳都有好多樹蔭,無需曝曬;整段路線全長大概 9公里,加上小休,路程大概要3小時。嶂上小平原隔離就係營地,有興趣camping嘅朋友仔滿足哂,喺周末假期仲有間許林士多可作小休,又有豆腐花食。

路線:海下路 > 嶂上 > 榕樹澳 > 水浪窩

交通

起點:搭專線小巴7號(於西貢市中心)同司機講嶂上有落

終點:沿引水道慢遊到西沙路,喺水浪窩站搭九巴99(至西貢或馬鞍山)/ 299X(至西貢或沙田)

【溫馨提示】郊遊時,要尊重自然環境,自己垃圾自己掉;行山前一定要做足準備,量力而為,唔好自己一個去行山。安全至上,一齊擁有靚景。 

Comment比我,一齊分享吓!

%d 位部落客按了讚: