綠蛋島位於清水灣半島東面海濱,近海濱嘅數座礁排,被統稱為爛排。祁麟峰喺2007年所著嘅《西貢海嶼美》中提到,爛排南組嘅礁排大致分為頭、二同三排,當中面積最大為三排,相信就係綠蛋島。但究竟幾時開始有綠蛋島這個外號?原來此名來自資深山友Mountain Yuen,喺2013年嘗試喺大嶺峒開路落爛排,喺山上見到此島好似一隻綠色嘅荷包蛋,故在個人網誌中為此島添上新名。之後多次帶人登島遊玩,綠蛋島之名就逐漸喺山界傳開去。加上附近水域清澈見底,網民讚稱為「玻璃水」,通常遊人會租船或者划獨木舟登島,不過亦有好多會選擇行山路過去。

這條行山路線嘗試從陸路接近綠蛋島,沿龍蝦灣郊遊徑登大嶺峒,之後沿小徑落到海邊石灘。遇上潮退嘅話,有行山人士會嘗試涉水登島。回程就選擇上落較少嘅方法,沿平托坑山嘅橫山徑離開,至龍蝦灣路完結。全程雖然不足4公里,但預算約4小時。

在鑽石山鐵路站乘搭九巴91號到大坳門下車,亦可以喺觀塘碼頭搭小巴103號或者喺將軍澳鐵路站搭小巴103M到大坳門迴旋處下車,之後沿清水灣道嘅馬路行到盡頭嘅停車場。如果唔想行馬路,可以直接搭的士入大坳門燒烤場,坑口站上的士車資大概$70。

來回綠蛋島路線:大坑墩 > 大嶺峒 > 爛排(綠蛋島)對岸石灘 > 橫山徑 > 龍蝦灣

馬路盡頭嘅停車場後有路通往公廁、燒烤場、風箏場同郊野公園遊客中心等設施。準備好一切後,回到清水灣道盡頭,行右邊馬路上斜,就見到龍蝦灣郊遊徑地圖,轉左沿石砌山徑起步。

初段係令人喘不過氣嘅梯級路,之後漸變為泥路上斜,沿路樹蔭好少,可以建議要著好防曬衣服!遠望可以睇到清水灣鄉村俱樂部嘅高爾夫球場同清水灣泳灘嘅景色。大概用半個鐘時間,就登上大概300米高嘅大嶺峒。

大嶺峒頂沒有樹蔭,非常曬,只有近上山路嘅位置有少少樹蔭,所以喺炎熱曝曬天氣下,大嶺峒頂不宜久留。之後繼續沿大嶺峒山脊行,山路轉為落斜後就見到綠蛋島。沿寬闊嘅泥路繼續落,行到標距柱C3202後,就建議放慢速度留意住右邊小路路口。

離開郊遊徑入小路

見到右邊有泥路小徑,轉入去。山頂起計行大概15分鐘就到這小路。小路由闊到收縮及落斜,朝綠蛋島方向下去。雖然睇落好近目的地,但都要行大概1個鐘先落到岸邊。

小路路胚明顯,沿途亦有唔少引路帶,但兩旁灌木林密集,建議著長褲去行,避免被枝葉割傷。全程幾乎暴曬,建議大家做好防曬措施。

行到一段路嘅時候,綠蛋島會被左邊嘅山頭遮住,放心!無行錯路。由郊遊徑小路口起計,大概15分鐘就會去到一個明顯嘅T字路口,絲帶佈滿,路口轉左繼續落斜,環山腰而走,跨過一條小石河,再行經一處甚少植被嘅石坡,沿大石而上,不久行到另一個Y字路口,左路上斜而右路落斜,選擇右邊路。可以一邊欣賞爛排、綠蛋島同爛排塘嘅景色。

最後一段路最崎嶇

當進入林中,最陡峭嘅斜路迎來,全程係斜度很高嘅沙泥路,要小心謹慎!路旁有以往山友架設嘅繩索,不過扶住兩邊嘅大石同樹幹會較穩陣,慢慢行落到底就到岸邊石灘。

雖然係閒日,但亦有唔少人黎玩;紮營、搵打卡位、浮潛游水,玩直立板同划獨木舟等等。遠望出海外面泊咗幾隻遊艇,當然唔少得來往西貢嘅快艇接載遊人離開。

如果想登島嘅話,就一定要留意潮汐漲退時間,潮退時,可以涉水行過去綠蛋島。雖然海水清澈見底,但都要小心水底可能有尖石、蠔殼甚至海膽。建議著水鞋行過去。最緊要係!自己垃圾自己帶走,綠蛋島是沒有垃圾桶的!

離開的方法有幾種,可以電召快艇,亦可原路折返,接回龍蝦灣郊遊徑,另外近年山友開出一條在平托坑山山腰的橫山徑,不用太多上落,約行1小時就到龍蝦灣。橫山徑雖然有啲崎嶇,但係係陸路來往綠蛋島最方便的方法。

最快出到龍蝦灣嘅山徑路線

首先沿石灘往龍蝦灣方向行,途中經過一個山水小水池,係附近一帶少有嘅淡水水源。經過小水池繼續沿石灘行,見到前方石崖上會有條白色繩,就係橫山徑入口!位置係有d難度,爬上石崖再接連林中斜路。大概5分鐘就上完斜路,路口行右路橫移,沿海而行。這條就係平托坑山山腰嘅橫山徑。由於係往返綠蛋島最快嘅陸路路線,所以路胚已經被人行到好明顯,引路絲帶亦多,再次提醒,記得著長褲。

崖頂落石灘考身手

山路會途經幾條小石澗,石澗附近嘅路會有濕石同濕泥,要小心地滑。眼望綠蛋島愈嚟愈細,而龍蝦灣嘅騎術學校就愈嚟愈清楚的話,代表住就到。

當山路進入林中,轉右落斜。不久出林,行到石崖頂部,從崖頂爬落石灘。有兩個選擇:1. 近海嘅石位落去,睇落難度較低,但石面濕潤,加上潮漲時不通行;2. 在崖頂橫移,見到乾身嘅石崖先爬落去,感覺難度略高。

石灘後有小路行上去馬術學校旁嘅石屎小徑,轉左行經過郊遊地點,沿梯級上去就行到公廁。離開公廁,落一段樓級,就到龍蝦灣路盡頭。龍蝦灣並沒有小巴或巴士抵達,一是電召的士,一是步行出大坳門迴旋處,搭九巴91號或小巴回市區。

有時間仲可以行去龍蝦灣石刻,一賞大概3000年前嘅紋飾,因為幾何圖案與青銅時代陶器同青銅器嘅紋飾近似,亦基於早期先民多靠海為生,有可能有鎮海護航之意。

今次嘅路程絕對有難度,並非新手路線,而且幾乎全程沒有樹蔭,沿路亦冇補給。路況大部分係原始小徑,以泥石為主,有啲地方好斜,建議穿行山鞋,真的不要穿短褲。此外,橫山徑出入口都要爬少少石崖,所以帶埋手套會好啲。

最後提醒大家,打算去玩水前,你係需要穿行山裝備,到海邊才換上玩水嘅裝束。

Comment比我,一齊分享吓!

%d 位部落客按了讚: