香港有唔少地質公園景點,全部都屬於世界級,除咗可以令到本港帶嚟旅遊動力之餘,同時可以感受埋自然生態變化所產生出嚟既獨特,亦可以感受到每個地質景點嘅文化遺產,就如地方傳統、產物同美食!

今次要介紹嘅地質公園係香港二疊紀園 — 馬屎洲,不過要去地質公園之前,會先經過三門仔同水茫田。

三門仔

一條歷史悠久嘅水上人漁村,但喺1960年因為政府興建船灣淡水湖,村民就遷居去現址鹽田仔,之後重新開村就將地名亦轉移過嚟,現名三門仔漁民新村。

喺三門仔總站落車後,就會見到迴旋處旁「馬屎洲特別地區」嘅牌坊。沿路轉入三門仔村。沿村大街行到近公廁位,見到指示牌就可以去左大埔地質教育中心先,再原路上樓梯轉右去馬屎洲。

大埔地質教育中心

中心內展示咗關於三門仔一帶的地質、人文、歷史、生態等資訊,仲有岩石標本供遊人參考。記得拎埋本小冊子,除咗可以更清晰點行之外,仲可以增長到每個景點嘅風貌知識!

位置:大埔三門仔120號

開放時間:星期六、日及公眾假期(9:30 a.m. – 5p.m. ),更設團體預約導賞服務

去馬屎洲之前會先去到連島沙洲同貝殼灘,只需要25分鐘就會到,途中可以睇到鹽田仔漁排,不過喺進入自然教育徑之前有一塊木板,潮漲時部分路段會被海水淹沒。

馬屎洲

自然教育徑沿途可以欣賞擁有2億年嘅傳奇岩石,共有16個景點。這條徑道可透過實地觀察同細閱傳意牌,了解連島沙洲同多種岩石嘅形成過程,以及海蝕、風化同褶曲等嘅地質現象。另外,有山友會以經驗去環島一週,但對於只係為咗去行下嘅朋友就千祈唔好去冒險,因為要好清楚潮漲時間,加上岩石面亦會較濕滑。

馬屎洲嘅岩石形成係喺二疊紀時期(約2億5千萬至2億8千萬年前),經歷多次大型地質運動後,留低嘅古老沉積岩同多種獨特地質構造,如斷層、褶曲、石英脈、結核、差異侵蝕、海蝕平台等。

常見嘅有泥岩、粉砂岩、砂岩、角礫岩、凝灰岩同層凝灰岩,各種各樣奇形怪狀嘅岩石,簡直眼界大開!

既然一場黎到,睇完日落順便留喺連島沙洲或去番三門仔北面沙灘,試下會唔會有運氣睇到「夜光藻」。

「夜光藻」

又叫「藍眼淚」,曾被美國CNN評選為世界15大奇景之一,英語更有「sea of stars(星之海)」或「sea sparkle(閃爍海洋)」嘅美譽!不過這種美麗嘅自然景象,不定時、不定點出現,令人難以捕捉。

但一般嚟講,藍眼淚出沒高峰期係4至6月,不過喺香港無論四季都曾經出現!有時海中發出隱隱藍光,有時就喺海浪拍岸時造成圍岸藍光,壯觀至極!

*小貼士:追淚先要上漁護署同天文台留意每週紅潮報有冇發現「夜光藻」同潮漲時間

位置:由大埔墟火車搭專線小巴20K / 74K

路線:三門仔>鹽田仔>水茫田>馬屎洲(原路折返或環島)>水茫田>鹽田仔>三門仔

所需時間:約3小時 (馬屎洲自然教育徑)

                   約4小時 (馬屎洲環島)

Comment比我,一齊分享吓!

%d 位部落客按了讚: