新田文氏係香港原居民,亦係在港被稱為新界五大家族之一,分支元朗新田同大埔泰亨。居民先後喺鄉村範圍興建文天祥公園同文山公園,「文天祥後人」成為咗他們嘅身份標記。喺世系上,文天祥並唔係新界文氏嘅直系祖先,他的堂弟文天瑞 (號東山)先係廣東文氏始祖,而新田文氏開基祖係文氏七世祖文世歌。

新田文氏宗祠

新田文氏宗祠又稱「惇裕堂」(法定古蹟),亦係文氏嘅太祖祠,始建於明正統九年(1444年),即七世祖文世歌喺新田開基年代。門聯「望煙傳世澤 正氣著家聲」,上聯追念二世祖文應麟建望煙樓濟貧嘅故事;下聯既追念文天祥被囚禁於元大都監獄時所寫嘅《正氣歌》。祀廳供奉文氏列位祖先,神龕中央最高處有兩塊雕有龍頭龍紋嘅特大神主牌,左邊係文天祥,右邊係文仲濟(文天祥同文天瑞嘅祖父),而文天瑞嘅神位置於旁邊。最難得嘅係能夠保存幾百年來逐次添加嘅原有神主牌位。

麟峯文公祠

係族人喺新田建立家祠,祭祀本房祖先。位於蕃田村嘅麟峯文公祠(法定古蹟)係新田最大嘅祠堂,係為紀念開山祖文世歌嘅兒子第八世祖文佛保(號麟峯)而建,約建於17世紀末,堂號為「吐書堂」,相信名稱取之麟峰文公之「麒麟吐玉書」穴。前廳中門掛有「吐書堂」匾額,由「嶺南第一才子」宋湘喺嘉慶丙寅年(1806年)題寫;中廳供奉超過二佰位文氏祖先嘅木主。

更練團巡丁館

麟峯祠後進左邊係昔日更練團存放長棍等武器嘅地方,右邊係羈留室,窗花用粗鐵枝加固,用嚟囚禁匪徒,所以亦被稱為「巡丁館」。

開放時間:星期一、三至日 (9am – 1pm及2pm – 5pm)

休館:星期二(公眾假期除外)、聖誕日、聖誕翌日、元旦日及農曆年初一至三

其他家祠仲有才煥文公祠(又名明遠堂)(二級歷史建築)、莘野文公祠(二級歷史建築)同永秀文公祠(又名明德堂)。

莘野文公祠

又名「樂道堂」,建於18世紀中,紀念文世歌之後人文莘野(又名文永瑞)。座落喺文氏宗祠旁邊,祠堂門額最精緻,底部有十字花幾何圖案,十分特別。

永秀文公祠

紀念文莘野之兄文永秀,建於1811年,1973年重建。室內懸掛住江西才子文廷式喺光緒十六年(1890年)高中第一甲第二名進士嘅「榜眼及第」牌匾,同樣麟峰文公祠亦有一樣嘅牌匾。

才煥文公祠

又名明遠堂,約建於1736年,以紀念文才煥(號青羅, 故另稱青羅祖),因此又稱文才煥公祠。明遠堂昔日曾經係祭祖祠堂,每逢節慶更會設宴款客,亦係文氏子弟嘅書室。

大夫第

大夫第(法定古蹟)係本港最華麗嘅傳統建築之一,以香港唯一有石灣瓦脊嘅府第而著名。座落喺鄰近蕃田村嘅永平村,係二十一世祖文頌鑾喺同治四年(1865年)所建。喺光緒元年(1875年)文頌鑾已係同知(正五品官),清代正五品官嘅官階名稱都係奉政大夫,所以「大夫第」因此而得名。

府內屋簷下有兩塊以滿漢二文寫成的牌匾,更是光緒帝於1875年御賜表揚文頌鑾雙親的詔書木刻。這種兩文對照的古匾在香港僅此一家,而夾在兩塊木匾之間的直匾由文灼勳題寫,他在光緒十二年(1886年)高中進士,獲朝廷欽點營用守府之職。

開放時間:星期一至日(8am – 1pm及2pm – 6pm)

休館:聖誕日、聖誕翌日、元旦日及農曆年初一至初三

東山古廟

以紀念文氏始祖文天瑞(號東山),被列為香港三級歷史建築。位於永平村嘅青山公路旁邊,廟宇最早建於明朝成化六年(1470年),後曾先後於清朝光緒十九年(1893年)、光緒三十一年(1905年)同1970年重修。2013年古廟拆卸重建後,只保留咗舊牌匾、木聯同石碑。

廟內供奉天后娘娘、龍母同侯王神祇,相信五百年前嘅東山古廟對外係一片淺灘,隨著土地開墾,文氏依靠鹹水田生產紅米,並築圍養魚蝦維生。而今日嘅東山古廟演變成一幢位於內陸的天后廟。東山古廟內並無記載著明朝成化時期嘅物件,例如洪鐘、碑記或匾額之類嘅古物。

文天祥紀念公園

原址為文氏原居民嘅公家果園,原居民後人稱為避免破壞當地風水龍脈同紀念文天祥而建,又名「文天祥公園」。

公園入口建有牌坊,正門上寫有「文天祥公園;正氣流徽」同「惇仁崇義、朗朗清風、像塑典型輝日月;裕德存忠、巍巍峻節、歌傳正氣壯山河」,由新田鄉人文幸福所撰寫。文幸福係國立臺灣師範大學教授及詩經研究學者。

公園內頂峰豎立咗文天祥銅像,有6米高,基座正面刻有文天祥嘅著名詩《過零丁洋》中兩句:「人生自古誰無死,留取丹心照汗青。」,係國將香翰屏兒子香灼璣嘅書法手筆。基座背部嵌有一篇《 新田文天祥塑像公園落成記石》,由文幸福教授撰寫,用意重振新田文氏家風,使子孫後世仁義向善,弘揚正氣,一舉數得。

銅像後有一幅十公尺嘅麻石浮雕,寫着文天祥的生平事蹟,當中包括耳熟能詳嘅《正氣歌》。

前往交通:

  1. 來往上水至朗屏巴士 76k (新田站落)
  2. 來往上水至元朗小巴 17號(新田公園落)
  3. 來往元朗至落馬洲轉車站小巴75號(新田公園落)
  4. 來往元朗至小磡村小巴76號(新田公園落)
  5. 來往大欖隧道收費廣場至落馬洲轉車站小巴78號(新田公園落)

Comment比我,一齊分享吓!

%d 位部落客按了讚: