一直唔知道有一個海下石堤、仿古天文台同彎曲山,一直四周搵香港靚景同古舊地方。今次就發現咗馬鞍山山腳同麥理浩徑第四段入面收埋咗個紅樹林、天空之城同彎曲山,另外仲意外發現到香港歷史上唯一一座進行過大規模機械開發嘅鐵礦場!全程都係 14公里!嚟到遊山玩水同探險之外,為咗大自然生態,記得自己垃圾自己帶走,唔好破壞咁靚嘅環境!

路線:海下石堤>水浪窩>木亭>彎曲山>昂平觀景台>馬鞍山郊遊徑>鞍山探索館>馬鞍山村路

海下石堤

喺沙田市中心搭299X巴士直接在「企嶺下新圍」站下車。下車後,先向後行去企嶺下新圍一路落斜到海邊,見小路入去直行,左邊有小路入石堤。企喺度視野同影相一流,睇到沿海岸嘅紅樹林帶同遠眺烏洲。

之後可以沿原路上番西沙路行去「水浪窩」站 - 水浪窩牌坊。

水浪窩觀星台

水浪窩牌坊上石梯去就嚟到觀星台,旁邊係燒烤場。觀星台就好似小城堡,係仿照河南登封縣告成鎮嘅古代觀測台而建,樓高約6米,四周都被綠林包圍,亦係香港唯一嘅仿古天文建築。觀星台平台上有石椅,可供遊客登上觀星同睇風景,睇完靚景同打卡之後就起行去彎曲山出發!

首先要行返去西沙路向右行麥理浩徑4段入口。沿麥理浩徑第四段嘅指示牌行,沿石屎路上會先見到一個直昇機升降坪,之後會去到水浪窩營地。再跟着左面嘅麥理浩徑4段山徑行,直到見到木亭 - 有指示牌上黃竹洋轉上行石屎路。沿路千祈唔好錯過任何一個靚景打卡!

一路沿麥理浩徑4段行,開始帶沙石路,冇耐左邊會有路上影相區。360度無敵景觀設置咗木製腳架俾山友們打卡用。

彎曲山

打完卡落番樓梯行麥理浩徑4段,有隱蔽支路可上彎曲山,但建議新手沿山腰繼續走。直到明顯嘅彎曲山分岔路口時先上一小節山徑,已經可以睇到蜿蜒曲折嘅麥理浩徑同後面嘅大金鐘山,輕易咁影到彎曲山徑同西貢景色,真係打卡熱點!

昂平觀景台

行麥理浩徑去馬鞍山郊遊徑落山,直到十字路口向恆安邨方向行。大概20分鐘後,終於到了馬鞍山村,路段開始變為行車馬路,左邊有石梯落馬鞍山村總站。

鞍山探索館

站頭左邊入村,走過平安橋,再上樓梯就會到鞍山探索館。這道平安橋,原係連接礦工往返礦場同屋企嘅通道,因當時採礦工作危險,只要工人能夠走過這道橋就意味着能夠安全回家。

原來馬鞍山曾經有全港最大型鐵礦場,有坑道、礦洞、教堂,全盛時期曾經有高達3,000名礦工喺度做嘢,連同家屬曾有住滿1萬人嘅馬鞍山礦村。雖然現時鐵礦場已不復存在,但信義會將遺址活化成鞍山探索館,傳承礦場歷史。只餘下礦洞遺址、三級文物古跡信義會恩光堂同數座礦場舊建築。

地址:馬鞍山村上村35號

開放時間:公眾開放為逢星期六、日或特定公眾假期10am – 5pm

現時240ML礦洞口仍接駁到110ML洞口,唔少行山勇士為一探礦洞奇景而穿梭探險。不過礦洞係禁止非法擅闖,而且自70年代起已荒廢,結構未必安全,建議遊人不要進入。礦洞口仍有細小同質素差嘅鐵礦石,眼看手勿動!

參觀完探索館就已經到今次旅程嘅尾聲喇,大家可以選擇行馬鞍山村路落番錦英苑,又或者喺總站搭NR84;但要留意服務時間!

Comment比我,一齊分享吓!

%d 位部落客按了讚: