香港近年多咗好多有由舊街場翻新活化嘅多用途運動場,亦有商場新增嘅戶外草地運動場。除咗基本運動設施,仲加入創意思維去設計出每個格調不一嘅靚場,做運動都精神啲啦!以下就介紹幾個位於天台嘅靚場比大家,經過就去踩吓場啦!

將軍澳「明德主場」

全港首個女性友善運動場

球場位於將軍澳嘅明德商場停車場上蓋,以鮮豔漸變顏色設計,從唔同嘅角度睇,會見到”W”或”M”字,同時代表Women(女性)及Men(男性),推行男女共融;同時,都可以象徵Willpower(意志力)、Worthiness(價值)、Motivation(動力)等等。球場圍欄上面仲刻咗好多具激勵性嘅字句:「練波辛苦 輸仲辛苦」、「完場前 永不放棄」、「完場後 不忘初心」等等,打波都有鼓勵作用!

作為全港首個女性友善嘅運動場地,場地亦同非牟利機構Women in Sports Empowered HK (WISE HK)合作,計劃持續舉辦女性恆常訓練班,鼓勵女性持續運動。球場外都有唔少貼心設施,包括鋼面鏡比運動員喺運動前後方便整理儀容,仲有掛袋勾方便掛隨身物品。場外一樣用咗鮮豔色彩設計嘅「Rest鬆」(Rest Zone),放咗啲輔助肌肉伸展嘅裝置,方便大家熱身拉筋同伸展放鬆運動。

地址:將軍澳培成里10號

開放時間:6am – 10pm

九龍灣「啟業運動場」

特色型格設計融入街頭文化

由黃色鐵欄包圍住嘅籃球場,又被稱為「黃金空中籠」,球場喺翻新後都依然保留呢個深入民心嘅特色。翻身後,場地加入特色元素,重新上漆嘅鐵籠換上更光鮮嘅黃色,場地同柱身漆上深灰色同黃色,換上透明籃板加螢光色外框,非常型格。設計者亦別有用心,加入許多香港元素,強調「敬業樂業 Never Quit」嘅香港精神,唔同地方都噴上咗一啲打氣金句。顏色方面加入咗螢光效果嚟代表香港嘅本土霓虹燈,配合埋場地嘅深灰色主色,十分搶眼。

球場變得多元化,場內特地設計了一個自由投球區域的藝術裝置 3 zone,在規例之外每個人都可以參與創新玩法,同時可以突破比賽中的二元對立,除此之亦加入唔少設施,例如圍住室內球場嘅緩跑徑、羽毛球場同三人足球場,另將原有室外空間改造為兒童同健身遊樂區,設有跳飛機格仔,啱哂小朋友!

地址:九龍灣啟業道18號啟業商場停車場天台

開放時間:7am – 10pm

屯門「兆禧運動場」

運動場由One Bite Design Studio設計,以藍、橙為主調,形成強烈對比,鮮豔嘅顏色為社區帶嚟唔少生氣。運動場設施豐富,主要有一個全場籃球場、一個多用途球場、兩個單邊籃球場、兩條長150米嘅緩步徑、仲有特色「遊戲地景」同「車胎地帶」。場地更加有特色賽道,可以用嚟作平衡車訓練同比賽。

又以「笑,嘻」為主題,設計咗多個打卡位,上落樓梯位、「笑左笑右」打卡牆同「微笑共創特色牆」,為大家注入歡樂愉快嘅氣氛。

若喺高空俯瞰球場,更可以清楚睇到球場中隱藏兆禧英文字「S」同「H」屋苑落成年份「8」「5」的字樣,細心觀察更會發現球場中隱藏的多個笑 臉。

球場部分時間需要預約,有興趣嘅朋友記得先上民坊官網預約!

地址:屯門湖翠路201號

開放時間:6am – 10pm

屯門「愛定籃球場」

位於屯門友愛同安定邨嘅愛定商場。由民坊、Red Bull同埋藝術企業SWL合作,將愛定籃球場翻新活化,將原身普通嘅屋村籃球場搖身一變成為色彩繽紛的潮流運動熱點,唔止為咗社區營造歡愉氣氛,更將藝術、體育及社區生活融為一體。藝術團隊將籃球場用上飽和度高嘅藍色同橙色形成強烈對比,再加入紫色作為副色調,用色繽紛奪目,很有活力同動感,充滿着街頭藝術嘅不協調感同強烈對比色調。籃球架亦精心設計過,使用咗橙白色作對比。其旁邊疊起嘅貨櫃同樣重新上色,圖案嘅風格同球場呼應,甚有美式街頭感覺,型格十足,活力十足!

地址:屯門鄉事會路2A號愛定商場上蓋

開放時間:9am – 9pm

青衣「長亨籃球場」

球場設計獨特,將青衣島嘅歷史同獨特面貌注入屋邨球場,提供到新穎運動設施之外,仲可以營造一種屬於青衣人嘅主場感覺!

青衣係香港第五大島嶼,係由三個海島填海而成。而青衣嘅個名係來自青衣魚,球場設計將以青衣島嶼形狀為主題,加上青衣魚嘅色彩斑斕顏色,打造成青衣特色嘅「主場」,帶俾街坊歸屬感。施工其間需要人手反覆雕琢島形嘅複雜線條,先做到預期藝術感十足嘅效果,啱哂打卡!

地點:青衣長亨邨二號停車場上蓋
開放時間:6am – 10pm

沙田新城市「躍動悠園Sportzone」

喺沙田新城市廣場平台有個新嘅運動公園免費比市民享用特色健身設施,有7大戶外Fitzone:好玩又刺激嘅5米高滑草梯、17米長S型懸吊式平衡木走道、15米長攀石牆、劃分成8種唔同訓練嘅無器械健身區、特色籃球場、草地緩跑徑仲有森系小山坡及秘道打卡區。場地色彩運用豐富,設施都頗多元化,雖然唔算喺正規嘅運動場,都適合一般家庭嚟做吓簡單運動輕鬆下!

地址:新城市廣場1期5樓平台
開放時間:7am – 10pm

**溫馨提示!打卡還打卡,要尊重自己尊重別人,唔好阻到其他人做運動呀!

Comment比我,一齊分享吓!

%d 位部落客按了讚: