喺沙田新市鎮開始發展時候,大圍村嘅「大圍」之名逐漸演變成整個沙田區南部嘅地區名稱。大圍村聽過未?懷舊老餐廳食過未?快啲碌落去睇下!

大圍村

大圍村又名積存圍,建於明朝萬曆二年(1574年),至今已有400多年歷史,係沙田最悠久亦係最大嘅圍村。大圍村有一道二級歷史建築嘅門樓,上面寫著「積存圍」,兩旁有副對聯,寫著「積善必降祥,心願萬家同積善」「存仁必獲報,遠其百姓共存亡」,圍底嘅侯王宮更係沙田區香火鼎盛嘅廟宇之一。

積存圍嘅命名

由19戶不同姓氏嘅村民合力建立,目的係團結一齊防盜。一眾鄉村組成九約(聯盟組織),共同肩負治安防衛責任。以韋姓人最多,成為村中大族,亦只有韋氏族人喺圍村內設有祠堂。

走進門樓可見中央巷道可以直達盡頭嘅侯王宮。

侯王宮

建於清初,而現今所見係1984年重建的。它有別於一般圍村嘅神廳,面積較大。廟內除咗供奉楊侯大王,仲有車大元帥同福德。每屆打醮以侯王宮嘅名義舉行,藉此酬謝侯王庇佑,祈求國泰民安。

侯王宮左偏廳有一塊喺咸豐十年(1860年)刻嘅碑記,題為「萬福攸同」:「我鄉建侯王宮廟者,自宋迄清,歷有年所。」又記下當年捐款重修侯王宮嘅人名。

喺積存圍前方嘅第一街有座金字頂舊屋(三級歷史建築),建於1915年,可見大圍村的舊貌。

韋氏宗祠

大圍韋氏宗祠就喺圍村隔離,門頂橫匾題為「京兆堂」,兩旁對聯「淮陰世澤」和「京兆家聲」,顯然與韓信大有關連,據說韋氏宗祠內供奉嘅神主牌背後皆書「韓」字,以示飲水思源,不忘祖先之意。

大圍公立學校

韋氏宗祠過去曾經成立鄉村學校,1967年建成大圍公立學校,喺1990年代開始空置;宜家喺積富街可以見到學校正門嘅牌匾,但經年月洗禮已經銹蝕,雜草亦入侵咗校舍。

舊文化活化係當然,但舊香港味道亦要靠大家支持!以下2間係系大圍較有歷史同味道嘅食店:

漢年茶餐廳

喺大圍超過30年歷史又有名嘅茶餐廳,店面雖舊,係90年代茶記格局,但餐牌一如傳統茶餐廳,早午下午茶,公仔麵碟頭飯奶茶同紅豆冰。最招牌嘅「 鹽焗雞飯」同「椒鹽豬扒飯」經年不衰,深受街坊熟客熱愛!

地址:大圍積福街100號

港興大飯店

主打傳統客家菜、平價價錢兼心機小菜。

八寶鴨、鹽焗雞係必試,皆因做法複雜、考手工,只有老店先食到。

地址:大圍村南道79-81號地下

Comment比我,一齊分享吓!

%d 位部落客按了讚: